“Realyň” we Braziliýanyň milli ýygyndysynyň hüjümçisi Winisius Žunior FIFA tarapyndan ýylyň iň gowy futbolçysy hökmünde saýlandy. The Best FIFA baýragynyň gowşurylyş dabarasy Dohada (Katar) geçirildi.
Baýrak üçin, hususan-da, geçen we häzirki möwsümlerde “Realda” çykyş eden alty oýunçy bäsleşdi. Winisiusdan başga-da, bular ispaniýaly Daniel Karwahal, urugwaýly Federiko Walwerde, angliýaly Jud Bellingem, fransiýaly Kilian Mbappe (geçen möwsüm Fransiýanyň “Pari Sen-Žermen” toparynda oýnady) we tomus karýerasyny tamamlan germaniýaly ýarymgoragçy Toni Kroosdyr.
Şeýle-de, baýraga ispaniýaly Rodri, norwegiýaly Erling Holand (ikisi-de “Mançester Siti”), germaniýaly Florian Wirs (“Baýer”), ispaniýaly Lamin Ýamal (“Barselona”), şeýle-de soňky iki baýragy utan (jemi – üç) argentinaly Lionel Messi (“Inter Maýami”) dalaş etdi.
Ýeňiji milli ýygyndylaryň kapitanlarynyň we tälimçileriniň, janköýerleriň we KHBS wekilleriniň ses bermegi netijesinde kesgitlendi.
Geçen möwsüm Winisius “Realyň” düzüminde UEFA-nyň Çempionlar ligasyny utdy we ýaryşyň iň gowy oýunçysy diýlip ykrar edildi. Şeýle-de, ol Ispaniýanyň çempionatynda we ýurduň Superkubogynda ýeňiji boldy.
FIFA 2024-nji ýylyň simwolik ýygyndysyny hem yglan etdi:
- derwezeban – Emiliano Martines (Argentina, “Aston Willa”);
- goragçylar – Daniel Karwahal (Ispaniýa, “Real”), Antonio Rýudiger (Germaniýa, “Real”), Ruben Diaş (Portugaliýa, “Mançester Siti”), Wilýam Saliba (Fransiýa, “Arsenal”);
- ýarymgoragçylar – Jud Bellingem (Angliýa, “Real”), Rodri (Ispaniýa, “Mançester Siti”), Toni Kroos (Germaniýa, “Real”);
- hüjümçiler – Lamin Ýamal (Ispaniýa, “Barselona”), Erling Holand (Norwegiýa, “Mançester Siti”), Winisius Žunior (Braziliýa, “Real”).
