Warner Bros. Emili Brontäniň täzeden ekranlaşdyrylýan “Tupanly belentlik” filminiň çykjak senesini yglan etdi. Film 2026-njy ýylyň 13-nji fewralynda görkeziler.
Taslamada baş keşpleri Margo Robbi (“Barbi”) bilen Jeýkob Elordi (“Eýforiýa”) ýerine ýetirer. Filme “Umyt döredýän gyz” we “Soltbýorn” filmleri bilen tanalýan, “Oskar” baýragynyň eýesi Emerald Fennell režissýorlyk eder. Film 2025-nji ýylda surata düşürilip başlanar.
“Tupanly belentlik” romany maşgala betbagtçylyklary we jemgyýetçilik dartgynlygy bilen garyşyp gidýän Hitkliff bilen Katriniň arasyndaky dramatik söýgi barada gürrüň berýär. Emili Brontäniň kitaby, takmynan, 20 gezek ekranlaşdyryldy. Ilkinji ekranlaşdyrylmasy 1920-nji ýylda West-Ýorkşiriň Hoerte obasynda ýazyjynyň öýünde surata düşürilen sessiz filmdir. Film surata düşürilende Lorens Oliwýe, Timoti Dalton, Reýf Faýns, Žýulýet Binoş we Tom Hardi ýaly kino ýyldyzlary birnäçe gezek çykyş etdi.
Bu roman dünýä edebiýatynyň iň beýik eserleriniň sanawyna yzygiderli girizilýär. BBC-iň wersiýasyna görä, ol iň gowy romanlaryň sanawynda 12-nji orny eýeleýär. Britaniýanyň UKTV Drama teleýaýlymy “Tupanly belentligi” ähli döwürleriň esasy romantik kitaby diýip atlandyrdy.
