Google öndürijiligini, tizligini we netijeliligini ýokarlandyrýan täze emeli aň modeli bolan "Gemini 2.0-ni" hödürledi diýip, "The Verge" habar berýär.
EA modeli diňe bir özünden öňki modeliň ähli artykmaçlyklaryny saklamak bilen çäklenmän, eýsem täze mümkinçilikleri hem görkezýär: onda içerki ses we şekilleriň döredilmegi, şeýle hem multimodal funksiýalar bar. Döredijileriň pikiriçe, bu model akylly agentleri döretmek üçin esas bolar.
"Gemini 2.0" öňki 1.5 görnüşiniň ilkinji gezek çykanyndan 10 aý soňra peýda bolýar. Häzir ol synag tapgyrynda elýeterlidir, şeýle-de onuň “Flash" ýeňil 2.0 görnüşi hem bar.
"Google DeepMind-iň" baş direktory Demis Hassabis bu ösüşiň adamyň adyndan dürli wezipeleri özbaşdak ýerine ýetirjek EA agentleriniň köpçülikleýin durmuşa geçirilmegine esas döredjekdigine ynanýar.
Mysal üçin, kosmosda gezmäge, obýektleri gözlemäge we daş-töweregi duýmak bilen baglanyşykly beýleki meseleleri ýerine ýetirmäge kömek edýän wizual ulgam bolan “Astra” taslamasynyň mümkinçilikleri giňelder. Mundan başga-da, "Google" Chrome brauzeri üçin Project Mariner barlag synagyny giňeltdi. Ol köp web meselelerini awtomatlaşdyrmaga kömek eder. Başga bir mysal, programmistlere kodundaky ýalňyşlyklary tapmaga we düzetmäge kömek etmek üçin döredilen Jules agentidir.
Model gözleg we Workspace platformasy ýaly kompaniýanyň esasy hyzmatlaryna birleşdiriler. Mysal üçin, “Google Search-de" eýýäm milliarddan gowrak adam tarapyndan ulanylýan “AI Overviews” aýratynlygy gowulaşar.
Birnäçe aýratyn we tapawutly önümleri çykarmagyň ýerine "Google" bu modeli ählumumy etmäge gönükdirýär.
Şeýle-de bolsa, howpsuzlyk nukdaýnazaryndan EA agentleriniň köpçülikleýin ulanylmagy hünärmenleriň arasynda alada döredýär. Hassabis izolirlenen şertlerde synag ýaly has köp gözlegiň zerurdygyny nygtaýar.
Gemini 2.0 indi Gemini web programmasynda synagdan geçirilip bilner. Geljek ýylyň başynda bu model beýleki "Google" önümlerine birleşdirilip, bütin internetde elýeterli edilmegi meýilleşdirilýär diýip, hightech.plus ýazýar.
