Hulu akym hyzmaty meşhur “Tussaglykdan gaçyş” (“Побег”) serialyna esaslanýan täze taslamanyň üstünde işläp başlady.
Deadline neşiriniň berýän maglumatlaryna görä, häzirki wagtda synag epizodynyň üstünde işlenip başlandy. “Düzgüni bozujylar” (“Нарушители”) we “Maýýanslar” (“Майянцы”) filmleri bilen tanalýan Eljin Jeýms serialyň şouranneri boldy.
Sýužetiň jikme-jiklikleri entek aýan edilmedi, ýöne täze hekaýanyň asyl serialyň dowamy däldigi mälimdir. Asyl nusganyň baş gahrymanlary Maýkl Skofild bilen Linkoln Berrous täze taslamada peýda bolmaz. Wakalar diňe meşhur serial bilen bir älemde bolup geçer.
Şeýle-de bolsa, “Tussaglykdan gaçyşyň” Pol Şoring we Marti Adelşteýn ýaly prodýuserleri serialyň üstünde işleýärler.
Täze serialy işläp düzmegiň meýilnamalary ilkinji gezek geçen ýylyň noýabr aýynda mälim boldy. 2005-nji ýylda çykan “Tussaglykdan gaçyşyň” asyl 5 möwsümi ýaňy-ýakynda Netflix-de peýda boldy we tomaşa edilişi nukdaýnazaryndan platformanyň öňdäki hataryna çykyp, ýene-de meşhur filme öwrüldi. Nielseniň berýän maglumatlaryna görä, bu serial 2024-nji ýylyň awgust aýynda ABŞ-da iň meşhur akym serialyna öwrüldi. Megerem, şu ýagdaý Huluny täze taslama döretmäge iteren bolsa gerek.
