Hytaýda sagatda 1000 km tizlige ýetip bilýän maglew-otlulary üçin täze liniýanyň gurluşygyna başlandy. Bu Boeing 737 ýolagçy uçarynyň kreýser tizligi bilen deňeşdirilýär diýip, Daily Mail ýazýar.
Uzynlygy 48,7 km bolan otly şahasy Hunan welaýatynyň Çanşa we Lýuýan şäherlerini birleşdirer.
Bahasy, takmynan 1,4 milliard dollar töweregi bolan taslama howanyň garşylygyny azaltmaga we otlularyň rekord tizlige ýetmegine mümkinçilik berýän magnit lewitasiýasy tehnologiýasyny we giperlupy ulanýar. Maglew ulgamy eýýäm Hytaýda, esasanam Şanhaýda ulanylyp ýör, şuňa meňzeş otly sagatda 430 km tizlige ýetýär we bary-ýogy 7,5 minutda 30 km geçip, her gün müňlerçe ýolagçyny gatnadýar.
Şol bir wagtyň özünde hytaýly inženerler adatdan daşary tizlikde hereket edip bilýän otlulary döretmäge mümkinçilik berýän wakuum tunellerini synagdan geçirýärler. Geljekde şeýle tehnologiýalar iri şäherleriň arasyndaky gatnawyň wagtyny ep-esli azaldyp biler.
Taslamany durmuşa geçirmek üçin ep-esli maýa goýumy we wagt gerek. Muňa garamazdan, şeýle tehnologiýalarda öňdebaryjy bolmak ugrunda Hytaý bilen eýýäm Germaniýadyr Ýaponiýa bäsleşýär.
