YouTube-de iň meşhur bloger bolan MrBeast täze Beast Games realiti-tomaşasy üçin kiçi şäher gurmaga 14 million dollar maýa goýdy. Ol ýerdäki ilkinji oýunlary 19-njy dekabrda başlamak meýilleşdirilýär diýip, Daily Afisha habar berýär.
“Biz öňdäki tomaşamyzyň gatnaşyjylary üçin 14 million dollarlyk şäher gurduk! Ähli zadymyzy orta goýduk, indem 19-njy dekabra sabyrsyzlyk bilen garaşýarys! " – diýip, bloger Instagramda ýazdy.
Amazon-yň Beast Games taslamasynda 5 million dollarlyk baş baýrak ugrunda 1000 adam bäsleşipdi. Bloger bu tomaşany "taryhdaky iň uly oýun taslamasy" diýip atlandyrdy we önümçilige çykarylan çykdajynyň 100 million dollardan geçendigini habar berdi. Tomaşanyň ýazgy wagtynda, iň uly pul baýragy we birinji epizodda berlen iň köp pul mukdary ýaly, Ginnesiň 28 rekordy goýuldy.
Belläp geçsek, şol ýaryşda 10-dan gowrak gatnaşyjy howpsuzlyk düzgünleriniň berjaý edilmeýändiginden, iýmit ýetmezçiliginden we meýdançada lukmanlaryň kemterlik edýändiginden zeýrenendiklerini bellemelidiris. Bäş gatnaşyjy kazyýete toparlaýyn arza berdi. Bu nägilelikleriň içinde “dowamly gödek ýüzlenmeler” we artyk işlenen wagt üçin hak tölenmezligi ýaly şikaýatlar bar.
Arzaçylaryň aklawçylary: "Gatnaşyjylar uzak we kyn bäsleşige gatnaşýandyklaryny bilseler-de, tomaşa düşürilmezden ozal şertnama baglaşan bolsalar-da, özlerine garaşýan zatlara taýyn däldiler" - diýdi.
Mundan öň, MrBeast futbolçy Kriştiano Ronalduwyň we beýleki professional türgenleriň gatnaşmagynda özboluşly bir çekeleşik geçiripdi. Şonda ýeňijä 1 million dollar baýrak gowşuryldy.
