Adatça, ýylyň ahyrynda Bill Geýts, öz pikiriçe, okamaga mynasyp bolan kitaplaryň sanawyny hödürleýär. Ol maslahatlary öz blogunda paýlaşdy.
Geýtsiň aýtmagyna görä, sanawdaky bäş kitabyň dördüsi gurşap alýan dünýä has gowy düşünmäge kömek edýär, bu bolsa çalt üýtgeýän eýýamda aýratyn wajypdyr.
Birinji maslahat – Doris Kerns Gudwiniň “Söýginiň tamamlanmadyk hekaýaty” (An Unfinished Love Story) eseri. Kitap awtoryň 1960-njy ýyllarda Prezidentler Kennedi we Jonson üçin Ak öýüň spiçraýteri (çykyşlaryň tekstini düzüji) bolup işlän adamsy bilen durmuşy barada gürrüň berýär. Geýtsiň pikiriçe, bu iş geçmiş bilen häziriň aralygyndaky meňzeşligi tapýar.
Ikinjisi, Jonatan Haýdtyň “Ynjalyksyz nesil” (The Anxious Generation) kitaby ene-atalar, pedagoglar we ýaşlaryň halypalary üçin peýdaly bolar. Awtor döwrebap tehnologiýalaryň we gajetleriň çagalaryň emosional ösüşine nähili täsir edýändigine seredip geçýär.
Üçünjisi, Gredi Hillhausyň “Tüýs inženeriýa” (Engineering in Plain Sight) kitaby. Bu kitap öýjükli aragatnaşyk diňleri we transformatorlar ýaly gündelik gurluşlaryň işini düşündirýär. Geýts ol adaty gurluşlardan hemmetaraplaýyn baş çykarmagy halaýanlar üçin gyzykly bolup biler diýip hasaplaýar. Milliarderiň aýtmagyna görä, bu kitap siziň güman etmedik soraglaryňyza jogap berer.
Dördünji maslahat – Mustafa Suleýmanyň “Gelýän tolkun” (The Coming Wave) kitaby. Kitapda emeli aň ýaly ylmy üstünlikleriň jemgyýeti nähili üýtgedýändigi öwrenilýär. Geýts ony tehnologiýalaryň häzirkizaman dünýäsine edýän täsiriniň iň gowy düşündirişi diýip atlandyrdy.
Soňky kitap – Doris Henkeliň tennisçi Rojer Federeriň durmuşyna bagyşlanan “Federer” (Federer) eseri. Geýts bu kitabyň gymmatdygyny we agyrdygyny, ýöne onuň tennis muşdaklary üçin gymmatly bir zada öwrüljekdigini belledi.
