1939-njy ýylda nusgawy sazdan döredilen “Oz ýurdunyň jadygöýi” filmindäki ýakut bilen bezelen zenan aýakgaplary 32,5 million dollara satyldy. Bu barada ABŞ-nyň Dallas şäherindäki “Heritage Auksion” auksion öýüne salgylanyp, NBC News habar berýär.
Dorotiniň keşbini ýerine ýetiren aktrisa Judi Garland bu aýakgaplary kinofilm surata düşürilýän wagty geýipdi. Bu lot auksionda uly gyzyklanma döretdi.
Nusgawy filmdäki jübüt aýakgaplary satyn almak üçin başlangyç baha 1,5 million dollardan başlandy. Auksion işgärleri tolgunmalara garaşýardylar we olary 3 milliona satmagy umyt etdiler, ýöne bu çaklamalaryň ikisi-de ilkinji minutda geçip gitdi.
Satylan dört toplumyň arasynda bu lot iň gymmady boldy. 2000-nji ýylda şuňa meňzeş aýakgaplar 666 000 dollara satyldy. 2012-nji ýylda bolsa Stiwen Spilberg we Leonardo Di Kaprio 2 million dollara şular ýaly başga bir jübüt aýakgap satyn alyp, Los Anjelesdäki Kinosungaty Akademiýasynyň muzeýine sowgat etdi.
32,5 milliona satylan aýakgabyň öz taryhy bar. Ol 2005-nji ýylyň awgust aýynda Minnesote ştatynyň Judi Garland muzeýinden ogurlandy. 77 ýaşly Terri Jon Martin aýna gabyň (witrinanyň) gapagyny çekiç bilen döwüp, ony ogurlap gaçdy. Aýakgaplaryň hakyky ýakut bilen bezelmändigini, bölekleriniň aýnadan ýasalandygyny bilip, Terri Jon Martin olary gahar-gazap bilen zyňdy.
Aýakgaplar 13 ýyldan soňra yzyna gaýtaryldy diýip, daily.afisha.ru ýazýar. 2018-nji ýylda FBI-e habar düşdi we gözleg işleri geçirilen wagtynda olar aýakgaplary tapdylar. 2024-nji ýylda bolsa olar auksiona goýulmak bilen eýesine gaýdyp geldiler.
ABŞ-nyň Kongres kitaphanasynyň habaryna görä, "Oz ýurdunyň jadygöýi" filmi kino taryhynda iň köp görülýän filmdir.
