Emeli aň üçin çipleri işläp taýýarlaýan Tenstorrent startapy 700 mln dollar maýa çekdi. Maýadarlaryň hataryna Amazon-yň esaslandyryjysy Jeff Bezos we Samsung goşuldy.
Günorta Koreýanyň AFW Partners we Samsung Securities kompaniýalarynyň ýolbaşçylyk etmegindäki täze maliýeleşdiriş tapgyry Tenstorrent-i 2,6 mlrd dollar bilen bahalandyrdy. Häzir kompaniýanyň EA çipleriniň bazarynda möhüm oýunçy bolmak we Nvidia bilen bäsleşmek üçin ähli mümkinçilikleri bar diýip, Tom’s Hardware belleýär.
Beýleki maýadarlaryň arasynda LG Electronics, Fidelity we Hyundai Motor Group bar.
Tenstorrent bu serişdeleri topary giňeltmek, üpjünçilik zynjyryny kämilleşdirmek, EA bilimleri üçin täze serwerleri döretmek üçin ulanmagy meýilleşdirýär. Nvidia-nyň ýapyk ekoulgamyndan tapawutlylykda, Tenstorrent kompaniýasy dürli tehnologiýalar bilen işleşmegi aňsatlaşdyrýan açyk RISC-V standarty bilen energiýa taýdan netijeli we tygşytly çipleri işläp taýýarlamaga ünsi jemlär.
Startapyň baş müdiri Jim Keller gymmat bahaly, ýokary tizlikli HBM ýadyndan ýüz öwürmegiň çykdajylary azaltmaga we bäsdeşlige ukyply çözgütleri döretmäge kömek etjekdigini belledi.
“HBM-i ulanyp, Nvidia-ny ýeňip bolmaz, sebäbi Nvidia HBM-iň uly bölegini satyn alýar we baha artykmaçlygyna eýe” – diýip, Keller aýtdy.
Kompaniýa eýýäm GlobalFoundries bilen hyzmatdaşlyk edýär, geljekki çipler bolsa TSMC bilen Samsung-yň gatnaşmagynda öndüriler. Şeýle-de, Tenstorrent TSMC, Samsung we Rapidus Corp. kompaniýalarynyň meýilnamalaryna ünsi jemläp, 2 nm çipleri çykarmak mümkinçiligini öwrenýär.
