Tokionyň Hökümeti döwlet gullukçylaryny dört günlük iş hepdesine geçirmek kararyna geldi. Japan Times neşiriniň habar bermegine görä, bu başlangyç ýurtda iň pes derejede bolmagynda galýan çaga dogluşyny ýokarlandyrmaga gönükdirilendir.
Saglygy goraýyş ministrliginiň maglumatlaryna görä, Tokiodaky her bir zenana ortaça 0,99 çagadan düşýär, munuň ýurt boýunça görkezijisi bolsa 1,2-ä deňdir. Ilatyň durnukly sanyny saklamak üçin koeffisiýent 2,1 bolmaly.
Tokionyň gubernatory Ýukiko Koikeniň sözlerine görä, täze iş tertibi raýatlara karýerany we maşgalany utgaşykly alyp barmaga kömek eder. 10 ýaşdan kiçi çagaly işleýän ene-atalara-da doly aýlyklaryny saklamak ýa-da aýlyklarynyň bir böleginden geçip, maşgalasyna has köp wagt sarp etmek üçin iki sagat öň öýlerine gaýtmak ýaly teklipler hödürlenýär.
Ýaponiýada çaga dogluşynyň derejesi sekiz ýyl bäri peselýär. Ýagdaýy gowulaşdyrmak üçin hökümet dürli çäreleri görýär. Hökümet iş şertlerini üýtgetmekden başga-da, çagalar baglaryna ýeňillikleri, sahylyk bilen çaga seretmeklik üçin rugsatlary we ene-atalara pul töleglerini berýär. Ýylyň başynda Ýaponiýanyň paýtagtynyň hökümeti, hatda ýeke ýaşaýan adamlara durmuşda taýyny tapmaga we nikalaşmaga kömek etmek üçin öz tanyşlyk programmasyny döretdi.
