Türkmen halkynyň Milli Lideriniň gol çeken Kararyna laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Tertipnamasy we müdiriýetiniň düzümi tassyklanyldy. Türkmenistanyň Halk Maslahatynyň Başlygy degişli resminamalara 7-nji dekabrda gaznanyň müdiriýetiniň mejlisinde gol çekdi.
Mejlisiň barşynda gaznanyň hukukçysy M.Hojamberdiýewa gaznanyň kanunçylyk-hukuk namalaryna girizilen üýtgetmeler barada hasabat berdi.
M.Hojaberdiýewa gaznanyň Tertipnamasyna, onuň ýanyndaky Ýaşulular geňeşi hakynda Düzgünnama, gaznanyň müdiriýetiniň düzümine täzeden seredilendigini hem-de olaryň taslamalarynyň taýýarlanylandygyny habar berdi. Şunuň bilen baglylykda, Tertipnama gaznanyň Prezidenti tarapyndan wezipä bellenilýän we wezipeden boşadylýan iş birlikleri girizildi. Olar gaznanyň dolandyryş işleri boýunça ýerine ýetiriji direktory — wise-prezidenti, bejeriş işleri boýunça ýerine ýetiriji direktory — wise-prezidenti, önümçilik işleri boýunça ýerine ýetiriji direktory — wise-prezidenti wezipelerinden ybarat. Olar gazna öz ygtyýarlyklarynyň çäginde ýolbaşçylyk edýärler diýlip bellenilip, Tertipnamanyň 13-nji bölegi täze mazmunda beýan edildi. Girizilen wezipeler bilen baglylykda, gaznanyň müdiriýetiniň düzümine gaýtadan seredilip, onuň taslamasy taýýarlanyldy.
Şeýle hem Tertipnamada gaznanyň Prezidenti tarapyndan döredilýän gaznanyň ýanyndaky Ýaşulular geňeşi hakyndaky kadalar aýratyn bapda beýan edildi. Agzalan bapda geňeşiň gaznanyň Tertipnamasynda kesgitlenen maksatlaryny guramaçylykly amala aşyrmaga ýardam berýän maslahat beriji topar bolup durýandygy, oňa gaznanyň Prezidentiniň ýolbaşçylyk edýändigi hem-de onuň düzümini we ol hakynda Düzgünnamany tassyklaýandygy beýan edildi. Ýaşulular geňeşiniň maksatlary we wezipeleri, geňeşiň agzalarynyň hukuklarydyr borçlary gaznanyň ýanyndaky Ýaşulular geňeşi hakynda Düzgünnama bilen kesgitlenilýär. Gaznanyň hukukçysy Ýaşulular geňeşi hakynda Düzgünnamanyň taslamasyny hem Gurbanguly Berdimuhamedowyň garamagyna hödürledi.
Gol çekilen resminama laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň düzüminde iki sany wise-prezident wezipeleri döredildi. Olar gaznanyň bejeriş işleri boýunça hem-de senagat ugry boýunça wise-prezidenti wezipelerinden ybaratdyr.
