BMG-niň Bilim, ylym we medeniýet meseleleri boýunça guramasy (ÝUNESKO) Aý senenamasy boýunça Hytaý Täze ýyly hökmünde belli bolan Bahar baýramyny (Çunsze) adamzadyň maddy däl medeni mirasynyň sanawyna goşdy. Bu barada Sinhua agentligi habar berýär.
Çözgüt ÝUNESKO-nyň maddy däl mirasy goramak boýunça Hökümetara komitetiniň 2 – 7-nji dekabrda Paragwaýda geçirilen 19-njy sessiýasynda kabul edildi.
Bahar baýramy üstünlikleri arzuw etmek, maşgalanyň birleşmegi we jemgyýetçilik çäreleri ýaly köp sanly däp-dessurlary we adatlary birleşdirýär. Bu däp-dessurlar hem maşgalalaryň, hem bilim programmalarynyň üsti bilen birek-birege geçirilýär.
Komitet baýramyň medeni aýratynlygy, sosial jebisligi we maşgala gymmatlyklaryny berkitmekde möhümdigini belledi. Şeýle-de, ol däp-dessurlaryň azyk howpsuzlygy we ekologiýa bilimi ýaly pudaklarda durnukly ösüşe goşant goşýandygyny belläp geçdi.
HHR-iň medeniýet ministriniň orunbasary Žao Sýuan baýramyň ykrar edilmeginiň halkara medeni alyş-çalşyga we ählumumy gymmatlyklary ýaýratmaga ýardam edýändigini aýtdy.
Bellenilişi ýaly, häzirki günde Hytaýyň ÝUNESKO tarapyndan adamzadyň maddy däl medeni mirasynyň obýektleri hökmünde ykrar edilen medeni elementleriniň ýa-da tejribeleriniň sany 44-e ýetdi.
