OPEK+ ýurtlary nebiti gazyp almagy günde 2,2 mln barrel meýletin azaltmagy 2025-nji ýylyň mart aýynyň ahyryna çenli uzaltmak barada ylalaşdylar. 1,65 mln barrel çäklendirmesi bolsa 2026-njy ýylyň ahyryna çenli dowam eder. Bu barada guramanyň saýtynda habar berilýär diýip, RBK belleýär.
“Soňra günde 2,2 mln barrel möçberde korrektirleme bazaryň durnuklylygyny saklamak üçin 2026-njy ýylyň sentýabr aýynyň ahyryna çenli aýlyk esasda kem-kemden ýatyrylar” – diýip, bileleşigiň ministrler duşuşygynyň jemi boýunça bellendi.
Mundan başga-da, OPEK+-yň ähli gatnaşyjylary üçin umumy önümçilik çäklendirmesi 2026-njy ýyla çenli uzaldyldy. BAE üçin kwotanyň günde 300 müň barrel artdyrylmagy, öň meýilleşdirilişi ýaly, 2025-nji ýylyň ýanwar aýyndan däl-de, aprel aýyndan başlar.
RF-niň wise-premýeri Aleksandr Nowakyň bellemegine görä, möhletleriň yza süýşürilmegi gyş döwründe bazaryň durnuksyzlaşmagynyň öňüni almaga gönükdirilendir. Durnuklaşdyryş prosesi 18 aý dowam eder.
OPEK+-a gatnaşyjylar Saud Arabystanyna dünýäniň nebit bazaryny goldamakda goşýan goşandy üçin minnetdarlyk bildirdiler.
Bileleşigiň ýurtlary global nebit önümçiliginiň 40%-den gowragyny emele getirýär.
