Türkmenistanda Halkara Bitaraplyk güni mynasybetli dekabryň başynda Garagum sährasynyň çäklerinde awtomobil sportunyň «Rally-reýd» görnüşi boýunça Türkmenistanyň çempionaty geçirildi.
Garagum sährasynyň Ahal we Balkan welaýatlaryna degişli çäklerinde guralan bu bäsleşige gatnaşyjylar umumy uzynlygy 161 kilometr bolan aralygy geçdiler. 2-nji dekabrda ýoluň 138 kilometri, 3-nji dekabrda galan 23 kilometri geçildi diýip, "Türkmenistan: Altyn asyr" elektron neşiri habar berýär.
Çempionaty Türkmenistanyň Awtomobil sport federasiýasy hem-de Bedenterbiýe we sport baradaky döwlet komiteti gurady.
Garagum sährasynyň çylşyrymly ýol şertlerinde guralan ýaryşa ýurdumyzyň Içeri işler ministrliginiň, «Türkmenawtoulaglary» agentliginiň we Türkmenistanyň Awtomobil sport federasiýasynyň ýygyndy toparlary gatnaşdylar. Bäsleşik T2 we açyk klaslar ýaly dürli derejelerde geçirildi.
Ýaryşda «Nissan Patrol», «Mitsubishi Pajero» we «Toyota Hiluх» kysymly awtoulaglara erk eden türgenler iň gowy netije gazandylar.
Ýaryşyň jemleri boýunça, T2 klasda netijeler:
- Birinji orun - «Türkmenawtoulaglary» agentliginden M.Toýlyýew;
- Ikinji orun - Türkmenistanyň Awtomobil sport federasiýasynyň türgeni M.Daňatarow;
- Üçünji orun - şol federasiýanyň türgeni M.Abdullaýew.
Açyk klasda:
- Birinji orun - «Toyota Hiluх» kysymly awtoulagda Ç.Çaryýew;
- Ikinji orun - Türkmenistanyň Awtomobil sport federasiýasynyň türgeni S.Kulalyýew;
- Üçünji orun - şol federasiýanyň türgeni Ý.Abaýew.
Ýeňijilere mynasyp bolan sylaglary dabaraly ýagdaýda gowşuryldy.
