Mýunhendäki (Germaniýa) Ketterer auksion öýi amerikaly suratkeş Robert Raýmanyň suratyny auksiona çykardy. “General 52×52” eseri suratsyz, doly ak syrça bilen boýalan suratdyr.
Deslapky hasaplamalara görä, bu sungat eseri 1-1,5 mln ýewro satylyp bilner.
Raýman 1930-njy ýylda Neşwillde doguldy we 1950-nji ýyllarda suratkeş karýerasyna başlady. Ol minimalizm we abstrakt ekpressionizm stillerinde işläp, tomaşaçylaryň ünsüni tekstura we jikme-jikliklere gönükdirdi. Ol ýörite suratkeşlik ugrundan bilim almady. Güýmenje hökmünde žiwopis bilen meşgullanmazdan ozal, ol jaz pianinoçysydy hem-de Nýu-Ýorkda (ABŞ) Häzirkizaman sungat muzeýinde gözegçi bolup işledi.
“General 52×52” suraty 1970-nji ýylda minimalistik eserleriň bir bölegi hökmünde döredildi. Umuman aýdanyňda, Raýman şol bir üstde şol bir reňki ulanyp, birnäçe surat eserini döretdi. Şolardan ilkinjisi gofrirlenen gaty kagyzda ak syrça bilen çekilen eserler ýygyndysy boldy.
Auksion öýüniň wekilleriniň pikiriçe, hut bu surat Raýmanyň döredijiliginiň esasy ýörelgelerini görkezýär: analitiki çemeleşme, ideal konseptual ýönekeýlik we esasy täsirli serişde hökmünde ak reňkiň ulanylmagy.
Raýmanyň döredijiligi häzirkizaman sungatynyň kolleksionerleri üçin gyzyklanma predmetidir. Onuň birnäçe işi eýýäm millionlarça dollara satyldy. Suratkeş 2019-njy ýylda 88 ýaşynda aradan çykdy.
