Beýik Britaniýada tas 400 ýyldan soň ilkinji gezek Wilgelm Basybalyjynyň ogly üçin gurlan Şa diňi myhmanlar üçin açyldy. Bu barada The Guardian habar berýär.
Şa diňi 1107-nji ýylda Wilgelm Genrih I-niň ogly üçin Purbek ýarym adasyndaky baýyrlygyň depesinde ýerleşen Korf galasynda guruldy. Ýalpyldaýan ak hek daşyndan gurlan 23 metrlik diň Gehrihiň iň ýokary ülňülere laýyklykda gurlan we uzakdaky raýatlaryny görmek üçin “syn ediş gapysyny” öz içine alýan hususy penthausydy.
Asyrlarboýy şa galasy bolup galan bu desga 1646-njy ýyldaky raýatlyk urşy döwründe bölekleýin ýumruldy. Şa diňiniň diwarlary saklanyp galsa-da, olara güýçli zeper ýetdi we şondan bäri onuň ýokarky otaglary köpçülik üçin ýapyldy.
378 ýyldan soň galanyň häzirki eýesi National Trust tarapyndan gurlan täze wagtlaýyn syn ediş meýdançasynyň kömegi bilen ýagdaý üýtgedi. Indi myhmanlar galanyň içindäki basgançak arkaly ýokaryk galyp, patyşanyň kaşaň otaglarynyň galyndylaryny hem-de penjireden görnüşi görüp bilerler. Ekskursiýa üçin petegiň bahasy 5 – 15 funt sterlinge barabar.
Galanyň ulanylyşy boýunça menejer Jeýms Gulduň aýtmagyna görä, bu taslama desganyň üçýyllyk abatlaýyş işleriniň bir bölegi boldy.
