“Moana 2” multfilmi geçen hepdäniň ahyrynda ABŞ-da 221 million dollar girdeji gazanyp, seljerijileriň çaklamalaryndan ýokary netije gazandy. Başda filmiň umumy girdejisi 135–175 million dollar bolar diýlip çaklanylypdy diýip, Variety habar berýär.
“Moana” filminiň dowamy Minnetdarlyk gününde (ABŞ-da) kassa ýygymy boýunça ozal “Doňan ýürek 2” filmine (130 million dollar) degişli bolan rekordy täzeledi. Mundan başga-da, multfilm taryhdaky animasiýa taslamalarynyň arasynda iň gowy başlangyjy görkezdi. Goşmaça dynç günleriniň gabat gelmegi muňa öz täsirini ýetirdi.
Häzirki wagtda “Moana 2-niň” kassa ýygymy 386 million dollar boldy. Seljerijiler filmiň 2024-nji ýylyň iň üstünlikli taslamalarynyň birine öwrülip, girdejisiniň 1 milliard dollardan geçip biljekdigini çaklaýarlar.
Filmiň sýužeti ata-babalaryndan syrly habar alýan Moananyň başdan geçirmelerini dowam etdirýär. Tolgundyryjy syýahata ugramak bilen, ol ýolda täze ýoldaşlara we garşydaşlara duşýar.
