Ispaniýada kanun taýdan tölegli iş rugsadynyň täze görnüşi girizildi. Ýurduň hökümeti işçilere suw joşguny ýaly tebigy betbagtçylyklar döwründe, iş hakyny tutup galmazdan, dört güne çenli öýde galmaga mümkinçilik berýän kanun taslamasyny tassyklady diýip, The Guardian habar berýär.
Kanun taslamasynyň kabul edilmegi oktýabr aýynyň ahyrynda ýüzlerçe adamyň ölümine getiren suw joşguny bilen baglanyşykly boldy. Käbir sebitlerde howplulygyň iň ýokary derejesi yglan edildi, ýöne käbir kompaniýalar işgärleriň işe çykmagyny talap etmegi dowam etdirdiler. Häkimiýetler telefon duýduryşlarynyň giç iberilendigini boýun aldylar.
“Eger häkimiýetler howa sebäpli jan üçin howpuň bardygy barada duýdurýan bolsa, adam işe çykmakdan saklanmalydyr” – diýip, zähmet ministri Iolanda Dias aýtdy.
Ol dowamly betbagtçylyk ýagdaýlarynda iş gününiň gysgaldylmagyna serediljekdigini belledi.
Ykdysadyýet ministri Karlos Kuerpo adatdan daşary howa hadysalarynyň netijeleri bilen göreş üçin çykdajylaryň 2050-nji ýyla çenli iki esse ýokarlanyp biljekdigini aýtdy. Şu ýyl zyýan çekenlere kömek üçin birnäçe milliard ýewro bölünip berildi.
Alymlar tebigy betbagtçylyklaryň ýygy-ýygydan bolmagyny howanyň global üýtgemegi bilen baglanyşdyrýarlar.
