“Red Bulluň” niderlandly sürüjisi Maks Werstappen “Formula-1” möwsüminiň iň soňkudan öňki tapgyry bolan Kataryň Gran-prisinde ýeňiş gazandy. Ol Dohadaky “Lusail” ýaryş ýolunda 57 aýlawy 1 sagat 28 minutda geçip, çempionatda öňdebaryjylygyny berkitdi.
Ikinji orny 6,031 sekunt yza galyş bilen “Ferrariniň” sürüjisi Şarl Lekler eýeledi. Üçlügi “Maklareniň” wekili Oskar Piastri jemledi.
Ýaryş hadysasyz geçmedi, ikinji orunda barýan Lando Norris sary baýdaklarda tizligi peseltmändigi üçin 10 sekuntlyk jerime aldy, netijede ol 10-njy ýere düşdi. Birinji aýlawda Franko Kolapinto bilen Esteban Okon çaknyşdy.
Ýaryşyň ortasynda falstart üçin +5 sekunt alan Lýuis Hemiltonyň we Karlos Saýnsyň tekeri deşildi. Bu Bernd Maýlanderiň ýaryş ýoluna çykmagyna sebäp boldy.
Guanýuý Çžou sekizinji orny eýeläp, “Kik-Zauber” üçin möwsümde ilkinji utuklary gazandy.
Şahsy sanawda 429 utuk bilen Werstappen öňde barýar. Lando Norris we Şarl Lekler ikinji setir üçin göreşi dowam etdirýär.
Konstruktorlaryň kubogynda “Maklaren” birinji orny eýeleýär. Ol “Ferrariden” 21 utuk we “Red Bulldan” 59 utuk öňde barýar.
Möwsüm 6 – 8-nji dekabrda Abu-Dabide geçiriljek ýaryş bilen tamamlanar, onuň netijesinde Konstruktorlaryň kubogynyň we umumy sanawda galan orunlaryň ýagdaýy kesgitlener.
