Halkara futbol federasiýasy (FIFA) dürli nominasiýalarda The Best FIFA Football Awards 2024 baýragyna dalaşgärleri yglan etdi.
Ýylyň iň gowy futbolçysy, derwezebany we tälimçisi adyna dalaşgärleriň sanawy düzülende 2023-nji ýylyň 21-nji awgustyndan 2024-nji ýylyň 10-njy awgustyna çenli döwürde oýunçylaryň we hünärmenleriň gazanan üstünlikleri göz öňünde tutuldy.
“Iň gowy oýunçy” nominasiýasynda 11 futbolçy görkezildi: Jud Bellingem, Dani Karwahal, Toni Kroos, Federiko Walwerde, Winisius (bäşisi hem – Madridiň “Realy”), Kilian Mbappe (“PSŽ”, 2024-nji ýylyň iýunynda “Reala” goşuldy), Rodri, Erling Holand (ikisi-de – “Mançester Siti”), Lionel Messi (“Inter Maýami”), Florian Wirs (“Baýer”) we Lamin Ýamal (“Barselona”).
“Iň gowy derwezeban” kategoriýasynda ýedi dalaşgär hödürlendi: Janluiji Donnarumma (“PSŽ”), Ederson (“Mançester Siti”), Andreý Lunin (“Real”), Mik Menýan (“Milan”), Emiliano Martines (“Aston Willa”), Dawid Raýýa (“Arsenal”) we Unaý Simon (“Atletik”).
Erkekler toparynyň iň gowy tälimçisi ady üçin dalaşgärleriň bäşligine girdi: Karlo Ançelotti (“Real”), Hosep Gwardiola (“Mançester Siti”), Habi Alonso (“Baýer”), Lionel Skaloni (Argentinanyň milli ýygyndysy) we Luis de la Fuente (Ispaniýanyň milli ýygyndysy).
Şeýle-de, iň gowy zenan futbolçy we iň gowy zenan derwezeban, zenanlar toparynyň iň gowy tälimçisi atlary, Marta baýragy, Puşkaş baýragy we beýleki baýraklar üçin dalaşgärler belli boldy.
Ýeňijiler 2024-nji ýylyň 10-njy dekabrynda tamamlanjak ses berişligiň netijesi boýunça kesgitlener.
Ses bermäge, adatça, FIFA agza ýurtlaryň hersinden üç wekil: milli ýygyndylaryň kapitanlary, olaryň baş tälimçileri hem-de žurnalistler gatnaşýar. Mundan başga-da, FIFA-nyň resmi saýtynda janköýerleriň arasynda ses berişlik geçirilýär, netijeler jemlenende onuň netijesi hem göz öňünde tutular.
