Beýik Britaniýada Ýer ýüzüniň iň garry erkek adamy Jon Tinniswud aradan çykdy. Ol 112 ýaşyndady. Bu barada merhumyň maşgalasyna salgylanyp, Mirror neşiri habar berýär.
Tinniswud 1912-nji ýylyň 26-njy awgustynda, “Titanik” gämisiniň gark bolan ýylynda dünýä indi. Ikinji jahan urşy döwründe ol iňlis goşunynda gulluk etdi. Soň bolsa Shell we BP nebit kompaniýalarynda hasapçy bolup işledi.
Tinniswud 1972-nji ýylda pensiýa çykdy, 14 ýyl soň bolsa aýaly aradan çykdy. Ol aradan çykanda garrylar öýünde ýaşaýardy we ýakynlarynyň sözlerine görä, “söýgi we aýdym-saz bilen gurşalandy”. Yzynda bir gyzy, dört agtygy we üç çowlugy galdy.
Ol 2024-nji ýylyň aprelinde wenesuelaly öňki rekord eýesi, fermer Huan Wisente Peres Mora ýogalandan soň, dünýäniň iň garry adamy diýen ada eýe boldy.
Özüniň 112 ýaşy barada Tinniswud uzak ýaşamagyň hiç hili syrynyň ýokdugyny, diňe ýaşlygynda işjeň bolandygyny, köp ýöreýändigini we her anna güni gowrulan ýeralma bilen balyk iýendigini aýtdy. Ýeke-täk beren maslahaty - hemme zatda çakyny bilmek.
