Madeýrada geçirilen dabarada syýahatçylyk pudagynda gazanylan üstünlikler üçin berilýän World Travel Awards 2024 baýragynyň laureatlary yglan edildi. Baýrak 300-den gowrak dürli kategoriýada gowşuryldy diýip, Karryon habar berýär.
Şu ýyl dünýäniň iň gowy syýahatçylyk ugry diýlip Maldiwler ykrar edildi. Bu adalar iň gowy ekologiýa taýdan arassa ugur titulyna-da eýe boldy.
Ýamaýka iň gowy kruiz ugry adyny aldy, iň gowy kenar şypahanasy baýragyny bolsa Portugaliýanyň günortasyndaky Algarwi sebiti aldy. Madeýra adalary iň gowy ada ugry kategoriýasynda ýeňiş gazandy, Gonkong iş saparlary üçin iň gowy ýer, Manila iň gowy şäher ugry boldy.
Dünýäniň iň gowy oteli hökmünde Dubaýdaky kaşaň 5 ýyldyzly Jumeirah Al Naseem saýlandy. Sardiniýadaky Forte Village Resort bolsa iň gowy kenar oteli hökmünde eýýäm ilkinji gezek baýrak alanok. Arzan myhmanhanalaryň arasynda guramaçylar Holiday Inn ulgamyny bellediler.
Pars aýlagynyň ýurtlaryndaky awiakompaniýalar syýahatçylyk ugrunda örän gowy netijeleri görkezdiler: Qatar Airways dünýäniň iň gowy awiakompaniýasy bolup, iň gowy biznes-klass üçin baýragy aldy, Etihad Airways iň gowy ekonom-klass, müşderi hyzmaty we garaşylýan zal üçin üç baýrak aldy, Emirates bolsa birinji klass we brend üçin iki baýraga mynasyp boldy.
Ýylyň iň gowy arzan awiakompaniýasy AirAsia boldy. Syýahatçylyk ýadygärlikleri kategoriýasynda Maçu-Pikçu ýeňiş gazandy, iň gowy syýahatçylyk kärhanasy hökmünde Filippinleriň syýahatçylyk gullugy saýlandy.
World Travel Awards baýragynyň esaslandyryjysy Grem Kuk “ýeňijileriň syýahatçylyk pudagynyň elitasyny görkezýändigini we olaryň her biriniň dünýäniň syýahatçylyk ykdysadyýetiniň ülňülerini ýokarlandyrandygy üçin gutlaga mynasypdygyny” belledi.
