Science Co. kompaniýasy Mirai Ningen Sentakuki (terjime edilende "geljegiň adamlary ýuwýan kir maşyny" diýen manyny berýär) atly enjamyň nusgasyny döretdi, bu enjam adamy 15 minutda ýuwup hem guradyp bilýär. Enjam 2025-nji ýylyň aprelinde Osaka Kansai Expo sergisinde görkeziler, diýip Asahi neşiri habar berýär.
Enjam içi oturgyçly, ýokarky bölegi açyk çarçuwaly kabinadan ybaratdyr. Suw kabinany doldurýar, görkezijiler bolsa basyşy we beýleki biometrik maglumatlary barlap, temperaturany sazlaýarlar. Şeýle hem emeli aň ulgamy “aýnanyň” ýüzüne dürli şekilleri proýesirläp, rahatlandyryjy şertleri döredýär.
Osakadaky sergide öndüriji günde sekiz adama çenli ýuwup, guratmak hyzmatyny teklip etmegi meýilleşdirýär.
Geljekde bu enjamyň öýde ulanylmaga niýetlenen wersiýasynyň hem çykarylmagyna garaşylýar.
Science Co. kompaniýasynyň ýolbaşçysy Ýasuaki Aoýama, 1970-nji ýylda Osakada geçirilen Bütindünýä sergisinde (Expo 70) "adam ýuwýan kir maşynyň" ilkinji nusgasyny görendigi barada gürrüň berdi, emma şol wagt enjam täjirçilik meşhurlygyny gazanmady. Aoýama bu taslamadan täsirlenip, bu pikiri has kämilleşdirilen görnüşde durmuşa geçirmek isledi.
Techcrunch neşiriniň belläp geçmegine görä, enjama nusga hökmünde hem seredilýär we onuň köpçülikleýin önümçilige çykmazlygy mümkin.
