Şu gün Singapurda häzirki dünýä çempiony hytaýly Din Ližen bilen ýaş hindi küştçüsi Dommaraju Gukeşiň arasynda dünýäniň küşt täji ugrunda ýaryş başlandy.
Bu Din Liženiň ikinji çempionlyk oýnudyr. Ol 2023-nji ýyldaky dünýä çempionatynda russiýaly Ýan Nepomniýaşini ýeňipdi. Şeýle-de bolsa 32 ýaşly hytaýly grossmeýsteriň soňky netijeleri peselýär, häzirki wagtda ol Halkara küşt federasiýasynyň sanawynda 23-nji orunda durýar. Küştçi ýeňişden soň özüni bagtly duýmaýandygyny we depressiýa düşendigini aýtdy.
Gukeş aprel aýynda dalaşgärler ýaryşynda ýeňiji bolup, bu ýaryşyň taryhynda iň ýaş çempion boldy (şol wagt entek 18 ýaşyndady). Ol sentýabr aýynda geçirilen Bütindünýä küşt olimpiadasynda-da ýeňiji bolup, hindi topary üçin ilkinji tagtada - 10 oýunda 9 utuk toplap, ussatlygyny görkezdi. Hünärmenler ony duşuşygyň iň ökdesi hasaplaýarlar, ýöne Liženiň hem garaşylmadyk ýagdaýy orta atyp biljekdigini aradan aýyrmaýarlar.
Duşuşyk klassiki wagt gözegçiligi bilen 14 oýundan ybarat bolar, birden deňme-deň oýnasalar, grossmeýsterler taý-breýk görnüşi boýunça ýaryşarlar.
Ýaryşyň baýrak gaznasy 2,5 million dollar bolar. Duşuşyk 13-nji dekabra çenli dowam edip biler diýip, TASS ýazýar.
