Singapuryň Gran-prisiniň jemi boýunça “Maklaren” topary möhletinden ir “Formula-1-iň” Konstruktorlaryň kubogy baýragyny aldy. Bu britan toparynyň konstruktorlar sanawynda yzygider ikinji we taryhda onunjy ýeňşidir diýip, ESPN belleýär.
Ýaryş şäher ýolunda geçirildi. Birinji bolup pellehana “Mersedesden” Jorj Rassell, ikinji – “Red Bulldan” Maks Werstappen, üçünji – “Maklarenden” Lando Norris geldi.
Tituly üpjün etmek üçin “Maklarene” sürüjileriniň biriniň – Norrisiň ýa-da Oskar Piastriniň münbere çykmagy gerekdi. Norrisiň üçünji orny eýelemegi netijesinde topar iň ýakyn bäsdeşi “Mersedes” üçin yzyndan ýetmezek boldy.
Geçen ýyl “Maklaren” 1998-nji ýyldan bäri ilkinji Konstruktorlaryň kubogy baýragyny diňe möwsümiň soňky ýaryşynda alyp bildi. Ol Norrisiň ýeňiş gazanmagy netijesinde “Ferrariden” 14 utuk öňe geçdi.
Indi çempionatyň gutarmagyna alty tapgyr galdy. Şeýlelikde, “Maklaren” möwsümiň tamamlanmagyna alty ýaryş galanda tituly üpjün etmek bilen, “Red Bulluň” 2023-nji ýyldaky rekordyny gaýtalady.
