“Maklareniň” britaniýaly sürüjisi Lando Norris häzirki “Formula-1” möwsüminde üçünji ýeňşini gazandy. Ol çempionatyň 18-nji tapgyry bolan Singapuryň Gran-prisinde ýeňiji boldy.
Birinji orundan badalga alan Norris Singapuryň ýaryş ýoly boýunça 62 aýlawyň netijesinde öňdebaryjylygy saklamagy başardy.
Ikinji orny “Formula-1-iň” häzirki çempiony Maks Werstappen (“Red Bull”) eýeledi, ol häzirki möwsümde ýeňişsiz tapgyryny sekiz tapgyra çenli uzaltdy. Üçünji bolup pellehana Norrisiň topardaşy awstraliýaly Oskar Piastri geldi.
Ilkinji onluk doly görnüşde şeýle: 1. Norris; 2. Werstappen, +20,945 sekunt; 3. Piastri, +41,823; 4. Jorj Rassell (Beýik Britaniýa, “Mersedes”), +1.01,040; 5. Şarl Lekler (Monako, “Ferrari”), +1.02,430; 6. Lýuis Hemilton (Beýik Britaniýa, “Mersedes”), +1.25,248; 7. Karlos Saýns (Ispaniýa, “Ferrari”), +1.36,039; 8. Fernando Alonso (Ispaniýa, “Aston Martin”); 9. Niko Hýulkenberg (Germaniýa, “Haas”); 10. Serhio Peres (Meksika, “Red Bull”) – galan ählisi bir aýlaw yza galdy.
Ýaryşda iň gowy aýlaw üçin bonus utugyny netijede 18-nji orny eýelän RB-den Daniel Rikkýardo aldy.
