Şu gün, 25-nji noýabrda Magtymguly adyndaky Türkmen döwlet uniwersitetinde ýokary okuw mekdepleriniň talyplarynyň arasynda himiýa dersi boýunça III halkara olimpiadasy açyldy. Bu barada TDU-nyň resmi saýtynda habar berilýär.
Olimpiada Russiýadan, Hytaýdan, Ýaponiýadan, Rumyniýadan, Eýrandan, Türkiýeden, Belarusdan, Gazagystandan, Ermenistandan, Täjigistandan, Azerbaýjandan, Özbegistandan ýokary okuw mekdepleriniň 23-sinden we ýurdumyzyň ýokary okuw mekdepleriniň 21-sinden talyplaryň 220-ä golaýy gatnaşýar.
Halkara olimpiadasynyň çäginde “Himiýany okatmagyň usulyýetiniň döwrebap kämilleşdirilmegi we himiki tehnologiýalaryň häzirki zaman ösüşi” atly halkara ylmy-amaly maslahaty hem geçirilýär.
Olimpiada halkara ülňülerine laýyklykda, şahsy we toparlaýyn görnüşde A we B derejede geçirilip, oňa ýurdumyzyň ylym-bilim edaralarynyň professor-mugallymlary, alymlary, hünärmenleri bilen birlikde daşary ýurtlaryň ýokary okuw mekdepleriniň professor-mugallymary, alymlary eminlik edip, Ýaponiýanyň alymlary synçy hökmünde gatnaşýarlar.
Olimpiada 30-njy noýabra çenli dowam eder.
