Çagalar ertekileriniň gahrymanlary bilen elhençlikler kinoälemini döredijiler täze filmiň surata düşürilip başlanjak senesini anons etdiler. Bu gezek Winni-Puh, Pinokkio we Piter Pen zalymlar toparyna birleşerler.
2025-nji ýylyň mart aýynda öň çykarylan horrorlaryň gahrymanlaryny bir krossower-lenta birleşdirjek film surata düşürilip başlanar. Winni-Puhdan, Pinokkiodan we Piter Penden ruhlanan personažlar adamlaryň arasynda bulam-bujarlygy döredýän esasy antagonistlere öwrüler.
Beýleki personažlaryň arasynda Ýemşijek, Gaplaň, Däli Şlýapaçy, Bembi, Din-Din, Ukudaky gözel we beýlekiler bar.
Filmiň sýužeti häzirlikçe gizlin saklanýar. Taslama “Puhwýors: Nägehanlar, birleşiň” (Poohniverse: Monsters Assemble) iş adyny aldy.
Film “Puhwýors” (Poohniverse) ady bilen hem tanalýan “Ýoýlan çagalygyň älemi” (The Twisted Childhood Universe) kinofranşizasynyň bir bölegi bolar. Taslamany döredijiler – prodýuserler we režissýorlar Ris Freýk-Uoterfild we Skott Jeffri filmlerde ulanmak hukugy jemgyýetçilik emlägine geçen erteki personažlaryny ulanýarlar.
Birinji film – “Winni-Puh: Gan we bal” (Winnie-the-Pooh: Blood and Honey) 2023-nji ýylda çykdy we kino tankytçylary hem tomaşaçylar tarapyndan ýiti tankytlandy. Muňa garamazdan, film prokatda önümçilik çykdajylaryny on esse ödedi. 2024-nji ýylda “Gan we bal 2” sikweli çykdy, ol tankytçylaryň pikiriçe, has gowy boldy.
Häzirki wagtda postprodakşn tapgyrynda ýene iki film bar – “Piter Pen: Netlandiýadaky elhençlik” (Peter Pan’s Neverland Nightmare) we “Bembi: Ar” (Bambi: The Reckoning). Munuň bilen ugurdaş “Pinokkio: Terbiýesiz” (Pinocchio: Unstrung) filminiň surata düşürilişi tamamlanýar. Üç filmiň hem relizi 2025-nji ýyla meýilleşdirilýär.
Mundan başga-da, Ukudaky gözel we Garpamyk barada aýratyn filmler taýýarlanýar.
