Hytaýly geologlar Hunan welaýatyndaky ýatakda, takmynan, 82,8 mlrd dollarlyk bahaly altyn ätiýaçlyklaryny tapdylar. Bu barada welaýatyň Geologiýa edarasyna salgylanyp, RIA Nowosti habar berýär.
Edaranyň WeChat sosial ulgamyndaky habarynda bellenilişi ýaly, geologlar Pinszýan uýezdindäki Wangu altyn ýatagynda 2 müň metrden gowrak çuňlukda 40-dan gowrak altynly gatlagy ýüze çykardylar. Esasy gözleg zolagynda umumylykda 300,2 tonna altyn ätiýaçlygy tapyldy, magdanda altynyň iň ýokary düzümi bir tonna üçin 138 gram boldy.
“Hünärmenler Wangu altyn ýatagynda magdan känleriniň göwrüminiň uludygy baradaky pikire geldiler. 3 müň metrden gowrak çuňlukda altyn ätiýaçlyklarynyň müň tonnadan gowrak boljakdygy, baýlyklaryň bahasynyň bolsa, altyn üçin häzirki bahalardan ugur alanyňda, 600 mlrd ýuana (82,8 mlrd dollar) ýetjekdigi çaklanylýar” – diýlip, habarda aýdylýar.
Wangu ýatagynda magdany gözlemegiň 3D geologik modelirleme ýaly täze tehnologiýalary ulanyldy.
Hytaý dünýäde iň uly altyn öndürijidir. Bütindünýä altyn geňeşiniň maglumatlaryna görä, 2023-nji ýylda Hytaý altyn önümçiliginiň, takmynan, 10%-ini emele getirdi.
