Ispaniýanyň Malaga şäherinde geçirilýän Dewisiň Kubogynyň dörtden bir finalynda Ispaniýanyň tennis boýunça milli ýygyndysy Niderlandlaryň toparyndan utuldy.
Duşuşyk niderlandlylaryň peýdasyna 2-1 hasabynda tamamlandy. Birinji oýunda ispaniýaly Rafael Nadal niderlandly Botik wan de Zandshýulpdan 4:6, 4:6 hasabynda utuldy. Ikinji oýunda Karlos Alkaras 7:6 (7:0), 6:3 hasabynda Tallon Grikspordan üstün çykdy. Jübüt görnüşde wan de Zandshýulp bilen Uesli Kolhof ispaniýalylar Alkaras bilen Marsel Granolýersden güýçli boldy – 7:6 (7:4), 7:6 (7:3).
Şeýlelikde, Niderlandlaryň milli ýygyndysy Dewisiň Kubogynyň ýarym finalyna çykdy.
Ozal hem habar berşimiz ýaly, bu oýun Rafael Nadal üçin karýerasynda iň soňky boldy. “Uly tuwulga” ýaryşlarynyň 22 gezek çempiony oýundan soň professional karýerasyny tamamlady.
“Titullar, sifrler – bularyň ählisi bar. Ýöne meni Malýorkadaky kiçiräk obadan öz arzuwyna tarap giden we şu günki şahsyýet bolmak üçin köp zähmet çeken sada adam hökmünde ýatlamaklaryny isleýärin” – diýip, Nadal karýerasyny tamamlamagy bilen bagly eden çykyşynda aýtdy.
Belläp geçsek, Dewisiň Kubogy 24-nji noýabra çenli dowam eder.
