Günbatar Orlandodan Cruise Tails we Expedia Cruises kompaniýalary itleriň “taryhda ilkinji” gämili syýahatyny gurnamak boýunça hyzmatdaşlyk etjekdiklerini habar berdiler. Margaritaville at Sea gämisi 2025-nji ýylyň noýabr aýynda Florida ştatynyň Tampa şäherinden Karib deňzi boýunça syýahata ugrar. People neşiriniň habar bermegine görä, syýahat 250 ite we olaryň hojaýynlaryna niýetlener.
Kruize goşulmak üçin syýahatçylar we olaryň haýwanlary ilki bilen tassyklama işinden geçmeli – zerur sanjymlary hödürlemeli we syýahat etmäge taýýardygyny görkezmeli bolar. Gämide adamlar we itler üçin bellibir düzgünler hereket eder.
Gämide her bir öý haýwanynyň eýesine hususy gullukçynyň berkidiljekdigi bellenilýär, ol syýahatçylaryň kaýutasynyň we umumy gäminiň talabalaýyk ýagdaýda bolmagyna gözegçilik eder.
Syýahatyň dowamynda it sergisi, dabaralar we iň gowy kostýumlaryň bäsleşigi gurnalar. Gämide itleriň grumeri, güjükler üçin massaž ýaly hyzmatlar hem hödürlener.
Neşiriň belleýşi ýaly, guramaçylar syýahaty “itler üçin ilkinji kruiz” hökmünde häsiýetlendirse-de, öý haýwanlary bilen syýahat etmek mümkinçiligini hödürleýän başga gämiler hem bar.
Mysal üçin, Cunard Line kompaniýasy adamlara Queen Mary 2 gämisine itlerini we pişiklerini ýany bilen almaga rugsat berýär.
