Google kompaniýasy Gmail-e “Goragly elektron poçtasy” (Shielded Email) ady bilen täze funksiýany girizmegi meýilleşdirýär. Ol ulanyjylara wagtlaýyn ýa-da bir gezeklik salgylary döretmek arkaly hakyky poçta salgysyny gizlemäge mümkinçilik berer diýip, 3DNews ýazýar.
24.45.33 wersiýaly Google Play Services-den alnan maglumatlara görä, täze funksiýa ulanyjylaryň gizlinligini goramak üçin niýetlenýär. Wagtlaýyn salga iberilýän hatlar awtomatik usulda esasy poçta gutusyna gönükdiriler.
Funksiýa, esasanam, poçta salgysynyň görkezilmegini talap edýän programmalarda we onlaýn-hyzmatlarda hasaba alynmakda peýdaly bolup biler. Wagtlaýyn salgylaryň ulanylmagy spam almak töwekgelçiligini peseldýär, onlaýn işjeňligiň yzarlanmak ähtimallygyny azaldýar we mümkin bolan maglumat syzmalaryndan goraýar.
Häzirki wagtda funksiýanyň giň auditoriýa üçin haçan elýeterli boljakdygy we onuň nähili işlejekdigi belli däl.
Google her gün millionlarça habarlary süzüp, spam bilen işjeň göreşýär.
