Hytaý 2028-nji ýylda başlamak meýilleşdirilýän “Chang'e-8” missiýasynyň işlenip taýýarlanylyşy baradaky jikme-jiklikleri paýlaşdy. Onuň esasy wezipesi Aý çeşmelerini ulanmak bilen baglanyşykly tehnologiýalary synagdan geçirmek bolar. Hususan-da, Aýyň topragyndan gurluşyk bloklaryny döretmek üçin 3D çap etmek we ýapyk ekoulgamy öwrenmek bilen bagly synaglara taýýarlyk görülýär diýip, Space.com habar berýär.
Toparyň baş konstruktory Wan Sýun gonuş modulynyň Aýyň üstünde enjamlary ýerleşdirmek üçin kran bilen üpjün ediljekdigini aýtdy. Missiýanyň toplumyna panoramik kamera, Aý radary we infragyzyl spektrometr ýaly ylmy gurallar bilen enjamlaşdyrylan alty tekerli rower girer.
Başga bir agzalan enjam - dört tekerli, ýokarky bölegi adama meňzeýän robot onuň ýene bir gyzykly aýratynlygy bolar. Onuň ýerine ýetirmeli wezipeleri entek agzalmady.
Bu missiýa 2030-njy ýyllarda Halkara Aý gözleg stansiýasyny döretmek maksatnamasynyň bir bölegi bolar. “Chang'e-8” -den öň Hytaý 2026-njy ýylda “Chang'e-7” missiýasyna başlar, bu hem stansiýanyň taýýarlanmagyna goşant goşar.
