Tehnologiýa magnaty Ilon Mask X sosial ulgamynda followerleriniň sany 200 milliona ýeten ilkinji adam boldy. Mask bu sosial ulgamy 2022-nji ýylyň oktýabr aýynda 44 milliard dollara satyn alypdy.
Häzirki günde Maskyň akkauntyny 205 million adam yzarlaýar. Onuň yzyndan uly tapawut bilen ABŞ-nyň öňki Prezidenti Barak Obama gelýär, onuň followerleriniň sany 131,2 milliona ýetýär. Üçünji orny 113,8 million yzarlaýan ulanyjy bilen futbolçy Kriştianu Ronaldu eýeleýär. Dördünji orunda 109,7 million adam bilen pop-ýyldyz Jastin Biber, bäşinji orunda 108,2 million follower bilen aýdymçy Rianna ýerleşýär.
Maskyň aýtmagyna görä, häzirki wagtda X ulgamynyň aýda 600 milliondan gowrak işjeň ulanyjysy we günde 300 million töweregi işjeň ulanyjysy bar.
Mask X-iň dünýäniň dürli ýerinden ulanyjylary özüne çekýän global “toparlaýyn çat” platformasyna öwrülendigini belläp, ony ulanyjylara filmler we seriallar bilen paýlaşmaga hem-de sanly tölegleri ýeňilleşdirmäge mümkinçilik berýän “hemme zat üçin programma” hökmünde kesgitleýär.
Şeýle-de, Mask ABŞ-da X-iň ulanylyşynyň rekord görkezijilere ýetendigini aýtdy.
