Dünýäniň birinji raketkasy italiýaly tennisçi Ýannik Sinner ATP-niň Jemleýji ýaryşy – 2024-üň ýeňijisi boldy. Ol finalda dünýäniň bäşinji raketkasy amerikaly Teýlor Frisi iki setde utdy. Duşuşyk 1 sagat 24 minut dowam edip, 6:4, 6:4 hasabynda tamamlandy.
Sinner bir setde-de utulman, ATP-niň Jemleýji ýaryşynyň ýeňijisi bolan ilkinji tennisçi boldy. Şeýle üstünlige ýetmek Iwan Lendliň döwründen (1986-njy ýyl) bäri hiç kime başartmandy. Ýaryşyň dowamynda Sinner Aleks de Minordan, Daniil Medwedewden we Kasper Ruuddan üstün çykyp, olara ýeňiş gazanmaga mümkinçilik goýmady.
Italiýaly bu ýaryş üçin baýrak hökmünde $4 881 500 gazandy. Bu hem erkekleriň arasynda (2022-nji ýyldaky Jemleýji ýaryşda Nowak Jokowiç $4 740 300 gazandy), hem zenanlaryň arasynda (2024-nji ýyldaky Jemleýji ýaryşda Kori Gauff $4 805 000 gazandy) absolýut rekorddyr.
ATP-niň Jemleýji ýaryşy – 2024-däki kubok Sinner üçin möwsümde sekizinji boldy. Ol 2024-nji ýylda Australian Open, US Open, şeýle-de Sinsinnatide, Rotterdamda, Maýamide, Gallede we Şanhaýda geçirilen ýaryşlarda ýeňiji boldy.
