Britaniýanyň muzeýine bahasy 1 milliard funt sterlinge barabar bolan hytaý keramikasy peşgeş berler. Bu karar Ser Persiwal Dewid gaznasynyň ýolbaşçylary tarapyndan yglan edildi. Bu Beýik Britaniýanyň muzeýlerine öňde-soňda gelip gowşan iň uly sowgat bolar diýip, BBC habar berýär.
1700 keramiki predmetden ybarat toplum 15 ýyllyk karz alnandan soň, resmi taýdan London muzeýine geçiriler - eksponatlar 2009-njy ýyldan bäri ýörite enjamlaşdyrylan 95-nji otagda ýerleşýär.
Keramika önümleri Ser Persiwal Dewid tarapyndan toplanan hytaý sungatynyň ajaýyp nusgalaryny öz içine alýar. Muzeýiň müdiri doktor Nikolas Kullinan toplumy, ylmy we medeni ähmiýetine ünsi çekip, “deňsiz-taýsyz şahsy kolleksiýa” diýip atlandyrdy.
Ol: "Bu meşhur zatlar kolleksiýamyza aýratyn bir goşant goşýar we dünýädäki alymlara, barlagçylara we myhmanlara bilelikde hytaý senetçiliginiň iň gowy nusgalaryny öwrenmek we lezzet almak üçin ajaýyp mümkinçiligi hödürleýär" – diýip belledi.
Britaniýaly telekeçi Ser Persiwal Dewid 1892-nji ýylda Bombeýde baý maşgalada dünýä indi we soňra Londona göçüp, Hytaý sungatynyň predmetlerini ýygnap başlady. Onuň ýygyndysynda Ýewropadan, Ýaponiýadan, Gonkongdan we Hytaýdan alnan eserler bar.
Gaznanyň howandarlary Dewidiň kolleksiýasyny halka elýeterli etmek isleýändiklerini bellediler.
"Ol şahsy kolleksiýasynyň adamlara bilim we ylham bermek üçin ulanylmagyny isledi" – diýip, gaznanyň işgärleri bellediler.
