Microsoft kompaniýasy 2024-nji ýylyň 31-nji dekabryndan “Poçta Windows”, “Senenama” (Kalendar) we “Adamlar” programmalarynyň goldawyny bes etjekdigini habar berdi. Bu programmalary henizem ulanmak bolar, ýöne olaryň işleýşi çäklendiriler diýip, 3Dnews portaly habar berýär.
Şeýlelikde, “Poçta Windowsda” elektron hatlary ugratmak we kabul etmek, “Kalendarda” bolsa duşuşyklary meýilleşdirmek mümkin bolmaz.
Şeýle-de, Windows üçin klassyky Outlook programmasynyň goldawy bes ediler. Kompaniýa eýýäm düýbünden täze wersiýany çykardy, ýöne oňa geçmek diňe ulanyjynyň razylygy bilen amala aşyrylýar. Klassyky Outlook ulanylanda ulanyjylar interfeýsiň ýokarky sag burçunda “Täze Outlook-y barlap görmek” geçirijisini görerler. Ulanyjy üýtgetmese, täze Outlook öçük durýar. Täze wersiýa doly geçilenden soň, ulanyjylar klassyky wersiýa dolanyp bilmezler.
Microsoft ulanyjylara öz maglumatlaryny täze Outlook programmasyna eksport etmegi maslahat berýär. Munuň üçin maglumatlary, şol sanda “Poçta Windowsdan” we “Adamlardan” elektron hatlary we kontaktlary eksport etmegiň awtomatik hem-de el usullary göz öňünde tutulandyr. Kompaniýa geçmek üçin ädimleýin görkezmeleri-de hödürleýär.
Täze Outlook programmasy öňki wersiýalar bilen deňeşdirilende has howpsuz we funksional bolmagy wada berýär. Täze wersiýany “Windows üçin Outlook” ady bilen Microsoft Store dükanyndan tapmak bolýar.
