“Oskar” baýragynyň eýesi Denzel Waşington “Gara Babyr” (Чёрная Пантера) kinokomiksiniň üçünji filmine gatnaşýandygyny tassyklady. Aktýor Today Show Australia bilen söhbetdeşlikde häzirki wagtda režissýor Raýan Kugleriň ssenariýanyň üstünde işleýändigini we özi üçin ýörite rol ýazýandygyny gürrüň berdi.
28-nji dekabrda 70 ýaşyny doldurjak aktýor bu taslamanyň kinokarýerasynda soňky rollarynyň biri boljakdygyny, sebäbi pensiýa çykmagy meýilleşdirýändigini aýtdy.
Waşington häzirlikçe öz personažy ýa-da filmiň sýužeti barada giňişleýin maglumat bermeýär. Marvel studiýasy hem trikweliň çykaryljakdygy barada resmi bildiriş aýtmady.
“Gara Babyr” filmi 2018-nji ýylda çykdy we ýylyň iň girdejili taslamalarynyň biri boldy. Çedwik Bouzmanyň gatnaşmagyndaky film dünýä boýunça 1,35 mlrd dollar ýygnady we üç “Oskar” baýragyny aldy. “Wakanda baky” (Ваканда навеки) goşmaça sözbaşyly ikinji bölüm Bouzmanyň ölüminden soň 2022-nji ýylda çykaryldy. Aktýor 2020-nji ýylda rak keseli sebäpli aradan çykdy.
Ýakyn wagtda Denzel Waşington noýabr aýynda çykmagy meýilleşdirilen “Gladiator 2” filminde ekranlarda peýda bolar. Şeýle-de, ol ýakynda Spaýk Liniň “Jennet we dowzah” (Рай и ад) filminiň surata düşürilişini tamamlady.
