Britaniýaly aktýory Mark Raýlens “Garri Potteriň” älemine esaslanýan HBO serialynda Albus Dambldoryň keşbini ýerine ýetirip biler. Variety -niň habar bermegine görä, Raýlens bu keşp üçin esasy dalaşgär hasaplanýar.
Resmi gepleşikler entek başlamady, ýöne Warner Bros. Television aktýoryň taslama elýeterliligini we gyzyklanmasyny kesgitlemek üçin eýýäm aktýor bilen habarlaşdy.
Mark Raýlens Stiwen Spilbergiň režissýorlyk eden “Içaly köprüsi” (“Шпионский мост”) filmindäki keşbi üçin “Ikinji plandaky iň gowy erkek keşbi” kategoriýasynda “Oskar” baýragyna eýe bolup, uly meşhurlyk gazandy. Raýlens “Dýunkerk”, “Kostýum”, “Uly we akýürek äpet”, “Wagşylara garaşmak” filmlerindäki we “Möjek zaly” mini-seriallaryndaky keşpleri bilen hem tanalýar.
Geljekki serialda Garriniň, Germionanyň we Ronyň keşplerini täze aktýorlaryň ýerine ýetirjekdigi öňdenem mälimdi. Sentýabr aýynda HBO 9-11 ýaş aralygyndaky çagalara keşpde oýnamak üçin açyk kasting çagyryşyny yglan etdi. Şol bir wagtyň özünde, neşiriň habar bermegine görä, Warner Bros. Discovery uly ýaşly gahrymanlaryň keşplerini ýerine ýetirmeklige meşhur iňlis aktýorlaryny çekmek isleýär.
Joan Roulingiň kitaplaryna esaslanan serial 2026-njy ýyldan öň çykmaz diýip garaşylýar.
Garri Potter hakyndaky filmlerde “Hogwarts” gözbagçylyk we jadygöýlük mekdebiniň müdiri Dambldoryň keşbini ilkinji gezek Riçard Harris oýnady. Aktýor diňe ilkinji iki filmde surata düşmäge ýetişdi we 72 ýaşynda aradan çykdy. Serialyň soňraky bölümlerinde onuň ýerine Maýkl Gembon geldi. Ol geçen ýyl aradan çykdy.
Ozal Warner Bros. “Garri Potteriň” yzygiderli ekranlaşdyrmalarynyň awtorlarynyň Joan Roulingiň kitaplaryny has çuňňur öwrenmegi maksat edýändiklerini habar berdi. Taslamanyň şouranneri “Mirasdüşerler” we “Garaňky materiallar” seriallarynyň üstünde işlän Françeska Gardiner bolar.
