Täze saýlanan Prezident Donald Tramp milliarder Ilon Maskyň we telekeçi Wiwek Ramaswaminiň Hökümet netijeliliginiň departamentiniň ýolbaşçylary bellenilýändigini habar berdi. Bu edara federal çykdajylary düzgünleşdirmek we hökümetiň gurluş özgertmeleri bilen meşgullanar. Degişli metbugat relizini Ilon Mask X sosial ulgamyndaky akkauntynda ýerleşdirdi.
“Bu iki beýik amerikaly bilelikde meniň administrasiýama hökümet býurokratiýasyny ýok etmäge, artykmaç kada aktlaryny, çykdajylary azaltmaga we federal agentliklerini üýtgedip gurmaga tarap ýol açar” – diýlip, Trampyň beýanynda aýdylýar.
“Bu ädim tutuş ulgamy sarsdyrar we döwlet serişdelerini harçlamaga gatnaşyjylaryň ählisine täsir eder, şeýle adamlar bolsa örän köp!” – diýip, Mask özüniň wezipä bellenilmegine teswir berdi.
Täze agentlige “Hökümet netijeliliginiň departamenti” (Department of Government Efficiency) adyny Trampyň özi berdi. Gysgaldylan wariant DOGE maskoty it bolan adybir kriptowalýuta salgylanmadyr. ABŞ-da Prezident saýlawlaryndan soňky bir hepdede bu kriptowalýuta 100%-den gowrak ýokarlandy.
“Biz her ýyl döwlet býujetine 6,5 trln dollar möçberde zyýan ýetiren köpçülikleýin harçlamalary we kezzaplygy ýok ederis. Kiçi, has netijeli we az býurokratlaşdyrylan döwlet Amerika üçin garaşsyzlygynyň yglan edilmeginiň 250 ýyllygyna ajaýyp sowgat bolar” – diýlip, beýanyň tekstinde aýdylýar.
Bellenilişi ýaly, Tesla we SpaceX kompaniýalarynyň ýolbaşçysy üçin federal hökümetdäki wezipe barada Tramp heniz saýlawdan öňki kampaniýasynda agzap geçipdi.
Telekeçi Wiwek Ramaswami Respublikan partiýasyndan prezidentlige dalaşgär boldy. Birwagtlar ol Trampyň administrasiýasynda wise-prezident wezipesi üçin göz öňünde tutuldy.
