“Uly tuwulga” ýaryşlarynyň iki gezek ýeňijisi italiýaly tennisçi Ýannik Sinner 2024-möwsüminiň jemi boýunça dünýäniň birinji raketkasy ady üçin kubok aldy. Dabara duşenbe güni, 11-nji noýabrda Turinde (Italiýa) geçirilýän ATP-niň Jemleýji ýaryşy – 2024-de geçdi.
2024-nji ýylda Ýannik Sinner iki “Uly tuwulga” ýaryşynda – Australian Open we US Open ýaryşlarynda ýeňiji boldy. Ol jemi ýedi ATP titulyny gazandy.
23 ýaşly Sinner ATP-niň dünýä reýtinginde ilkinji gezek 2024-nji ýylyň iýun aýynda birinji orny eýeledi. 11-nji noýabrdaky reýtinge görä, italiýaly türgen ýakyn bäsdeşi germaniýaly Aleksandr Zwerewden 3000-den gowrak utuk aratapawudyna eýe.
“Uly tuwulga” ýaryşlarynyň üç gezek ýeňijisi belarusly tennisçi Arina Sobolenko hem Er-Riýadda (Saud Arabystany) 2024-möwsüminiň jemi boýunça dünýäniň birinji raketkasy ady üçin kubok aldy.
2024-nji ýylda Arina Sobolenko iki “Uly tuwulga” ýaryşynda – Australian Open we US Open ýaryşlarynda ýeňiji boldy. Ol jemi dört WTA titulyna eýe boldy we üç gezek final oýunlaryna gatnaşdy. Er-Riýadda geçen hepde tamamlanan WTA-nyň Jemleýji ýaryşynda ol ýarym finala çykyp, geljekki ýeňiji amerikaly Kori Gauffdan utuldy.
26 ýaşly Sobolenko karýerasynda ilkinji gezek ýyly dünýä reýtinginiň lideri hökmünde tamamlady. Öň onuň iň gowy görkezijisi reýtingiň ikinji setiri bolupdy.
