Toyota Hytaýda önümçiligi artdyryp, 2030-njy ýyla çenli ýylda azyndan 2,5 mln awtomobil çykarmagy meýilleşdirýär. Bu ädim awtoöndürijiniň dünýäniň iň uly awtomobil bazarlarynyň birinde, aýratynam, hytaý öndürijileri tarapyndan bäsdeşligiň güýçlenýän döwründe işewürligi işjeň ösdürmäge tarap strategik öwrülişigini görkezýär diýip, Reuters habar berýär.
Toyota-nyň bu strategiýasy Hytaýda önümçiligi azaldýan ýa-da bu bazardan gidýän beýleki global awtoöndürijileriň strategiýalaryna çapraz gelýär. Onýyllygyň ahyryna çenli önümçilik ýylda 3 mln awtomobile ýetip biler diýlip meýilleşdirilýär.
2022-nji ýylda Hytaýda öndürilen 1,84 mln awtomobil bilen deňeşdirilende, önümçiligi 63% artdyrmak meýilnamasy kompaniýanyň HHR-de çynlakaý ornaşmak isleýändigini görkezýär. Toyota eýýäm birnäçe üpjün edijilere önümçiligiň artdyryljakdygy barada habar berdi, bu öz gezeginde olaryň kompaniýanyň Hytaý bazaryndaky uzak möhletleýin meýilnamalaryna bolan ynamyny güýçlendirip, durnukly üpjünçilik zynjyryny üpjün etmeli.
Täze strategiýanyň çäklerinde Toyota netijeliligi ýokarlandyrmak üçin Hytaýda iki sany bilelikdäki kärhanasynyň satuw we önümçilik bölümlerini birleşdirmek isleýär. Bu meýilnamanyň ýene bir möhüm elementi täze modelleri işläp taýýarlamak üçin jogapkärçiligiň bir bölegini ýerli isleglere has çuňňur düşünýän hytaýly hünärmenlere bermek bolar. Bu ädimler önümleri işläp taýýarlamak prosesini çaltlaşdyrmaga we Hytaý bazaryna uýgunlaşmaga kömek eder.
Şeýle-de, Toyota öz hytaýly hyzmatdaşlarynyň awtomobil işläp taýýarlamak tejribelerini göz öňünde tutmak üçin, olar bilen has ýakyndan işleşmegi meýilleşdirýär.
Şeýlelikde, Toyota Hytaý bazaryndaky barlygyny berkidip, döwrüň kynçylyklaryna jogap bermegi we alyjylaryň üýtgeýän zerurlyklaryna uýgunlaşmagy maksat edinýär.
