Microsoft Windows 11-iň Notepad we Paint programmalaryna täze emeli aň funksiýalaryny goşdy. Häzirki wagtda bu täzelenmeler diňe çäkli mukdardaky synagçylar üçin elýeterlidir diýlip, Windows Insider blogunda aýdylýar.
Indi Notepad tekstiň uzynlygyny we sazlaşyklylygyny üýtgedip, teksti başga sözler bilen beýan edip bilýär. Munuň üçin ulanyjylar teksti saýlap, “Täzeden ýazmak” opsiýasyny ulanmaly. Bu funksiýa häzirki wagtda diňe ABŞ-da, Angliýa, Kanada, Fransiýa, Italiýa we Germaniýada elýeterlidir.
Paint-de suraty redaktirlemek üçin emeli aň gurallary peýda boldy. “Generative Fill” isleg boýunça bölekleri goşmaga, “Generative Erase” bolsa şekiliň böleklerini aýryp, boşlugy doldurmaga mümkinçilik berýär. Bu aýratynlyklar ulanyjylara suratlary has çalt redaktirlemäge kömek eder.
Microsoft bu täzelenmeleriň haçan ähli ulanyjylar üçin elýeterli boljakdygyny kesgitlemedi, ýöne olaryň birnäçe aýdan çykaryljakdygy çak edilýär.
