Microsoft korporasiýasy emeli aň (AI) hyzmatlarynyň hemmesini täze Windows Intelligence brendi astynda birleşdirmegi göz öňünde tutýar. Bu barada Windows Central habar berýär.
Neşiriň bilermenleri Windows 11-iň ulgam kodunda Windows Intelligence salgylanmalaryny tapdylar, bu bolsa Copilot ýaly bar bolan AI gurallarynyň adynyň üýtgedilmeginiň ähtimaldygyny görkezýär.
Häzirki wagtda Copilot ady Github-da we Bing Chat-da kody awtomat doldurmagy goşmak bilen, Microsoft-yň birbada birnäçe AI önümi babatda ulanylýar. Žurnalistler, Apple Intelligence-iň mysalynda, AI hyzmatlaryny ulanyjylara has düşnükli we özüne çekiji etmek üçin kompaniýanyň rebrend bermek kararyna gelendigini öňe sürýärler.
Hünärmenleriň pikirine görä, rebrending Microsoft-a AI hyzmatlaryny tapawutlandyrmaga we emeli aňyň ulanylyşyna has bitewi çemeleşmäni hödürlemäge mümkinçilik berer. Şeýle-de bolsa, Microsoft-yň “Copilot” adyndan düýbünden ýüz öwürmek niýeti ýok, bu aýratyn AI esasly gurallaryň biri üçin saklanyp bilner.
Şol bir wagtda Microsoft ulanyjylara AI-niň kömegi bilen öňki işlerine gaýdyp gelmäge mümkinçilik berýän Windows 11 üçin Recall funksiýasynyň goýberilmeginiň nobatdaky gezek gijä galýandygyny yglan etdi. Kompaniýa täze funksiýanyň goşmaça işlenilmegi talap edýändigini we soňrak elýeterli boljakdygyny aýtdy.
