Ýewropa Bileleşigi iri tehnologiýa kompaniýalarynyň işini düzgünleşdirmäge gönükdirilen Sanly bazarlar baradaky täze kanunyň (DMA) çäklerinde Apple kompaniýasyna ilkinji jerimäni salmaga taýýarlanýar.
Bloomberg we Reuters agentlikleriniň maglumatlaryna görä, bu jerime Apple-iň işläp düzüjiler üçin çäklendirme girizmegi bilen baglanyşyklydyr. Has takygy, kompaniýa işläp düzüjilere hyzmatlary has amatly bahadan tölemek üçin ulanyjylary App Store-dan daşary gönükdirmegi gadagan edýär. Ýewrokomissiýa şeýle hereketleri bäsdeşlik üçin böwet hasaplaýar.
Çeşmeler jerimäniň noýabr aýynyň ahyryna çenli, ýagny ÝB-niň bäsdeşlik meseleleri boýunça häzirki komissary Margaret Westageriň wezipede wagty salnyp bilinjekdigini belleýär. Ýogsam, çözgüt has giçki möhlete süýşürilip bilner, ýöne çaklamalara görä, çözgüt ýylyň ahyryna çenli çykarylar. Bir gezeklik jerimeden başga-da, Apple kompaniýanyň işi DMA talaplaryna laýyk gelýänçä hereket etjek dowamly tölegler bilen ýüzbe-ýüz bolup biler.
Sanly bazarlar baradaky kanun 2024-nji ýylyň mart aýynda doly güýje girdi. Ol birinji gezek düzgün bozulma ýagdaýynda kompaniýanyň umumy satuwynyň 10%-ine we düzgün bozulma gaýtalanan ýagdaýynda 20%-ine çenli möçberde jerimäni göz öňünde tutýar. Şeýle-de, ortaça günlük girdejiniň 5%-ine çenli döwürleýin jerimeler göz öňünde tutulandyr.
Apple Bloomberg-iň bu babatda haýyşyna teswir bermedi, Ýewropa Komissiýasy hem giňişleýin düşündiriş bermekden saklandy.
