Riot Games studiýasynyň “Arkeýn” multserialy taryhda iň gymmat multserial boldy. Variety neşiriniň önümçilik prosesinden habarly çeşmelere salgylanmagyna görä, bu taslamanyň iki möwsümi üçin 250 mln dollar sarp edildi.
Dokuz sany 40 minutlyk bölümden ybarat bolan birinji möwsümiň bahasy 80 mln dollar boldy. Ikinji möwsüm has gymmada – takmynan, 100 mln dollara düşýär.
“Arkeýniň” önümçiliginiň şeýle gymmat bolmagynyň birnäçe sebäbi bar. Birinjiden, taslama köp resurs talap etdi, bölümler üçin ssenariýalar öz wagtynda taýýarlanylmady, bu bolsa prosesi haýallatdy. Ikinji möwsüm ssenariýalar doly işlenip gutarmanka surata düşürilip başlandy, bu hem goşmaça çykdajylara sebäp boldy.
Studiýa birinji möwsümiň marketingine rekord 60 mln dollar sarp etdi, bu onuň taslamalary ilerletmek üçin adaty harajatlaryndan birnäçe esse köpdür. Ikinji möwsümiň mahabatyna kompaniýa az mukdar bölüp aýyrmagy meýilleşdirýär.
Pudak çeşmeleri ýokary çykdajylary animasiýa we güýmenje pudagynda Riot Games-iň tejribesizligi bilen baglanyşdyrýarlar. Studiýa ilkibaşda “Arkeýniň” bäş möwsümini çykarmagy meýilleşdirdi, ýöne indi ikinji möwsüm jemleýji bolar.
“Arkeýn” meşhur League of Legends oýnuna esaslanýar. Serial 2021-nji ýylyň noýabr aýyndaky premýerasyndan soň meşhurlyk gazandy. Ol tomaşa boýunça hatda “Kalmar oýny” koreý serialyndan hem öňe geçdi we 2022-nji ýylda animasiýada gazanan üstünlikleri üçin üç “Emmi” baýragyna mynasyp boldy.
Ikinji möwsümiň birinji aktynyň premýerasy 9-njy noýabrda bolar.
