“Pop aýdym-sazynyň şasy” Maýkl Jeksonyň durmuşyna bagyşlanan “Maýkl” filminiň çykjak möhleti alty aý yza süýşürildi. Lentanyň premýerasy 2025-nji ýylyň 3-nji oktýabrynda bolar diýip, Collider neşiri habar berýär.
Surata düşürmek işleriniň gijikdirmesiz geçirilendigine garamazdan, Lionsgate studiýasy biografik filmiň gowşurylyş dabarasy, adatça, gyşda geçirilýän baýraklar ugrunda bäsleşip bilmegi üçin möhleti yza süýşürmek kararyna geldi.
Studiýanyň wekilleriniň belleýşi ýaly, filmiň birnäçe nominasiýada görkezilmek üçin uly mümkinçiligi bar. Lionsgate taryhyň tomaşaçylaryň we tankytçylaryň seslenmesini aljakdygyna ynanýar.
Filmiň režissýory hökmünde Antuan Fukua çykyş etdi, ssenariýany Jon Logan ýazdy.
“Men netijeden örän hoşal. Öňem aýdyşym ýaly, montaž heniz irki tapgyrda, şonuň üçin bu barada kän gürleşmek islämok. Maýkl meniň durmuşymyň uly bölegi boldy, haçan-da ulalamda, karýerama uly täsir etdi, üýtgeşik artistdi, ýöne şol bir wagtyň özünde ol şahsyýetdi we biz muny öwrenýäris” – diýip, Fukua belledi.
Film jemgyýetçilik durmuşy bilen hususy ýekeliginiň arasynda deňagramlylygy saklaýan hem-de başdan geçirmedik çagalygynyň öwezini dolmaga ymtylýan Jeksonyň çylşyrymly durmuşyny öwrenýär. Baş keşbi sazandanyň ýegeni Jafar Jekson ýerine ýetirdi. Beýleki rollarda Kolman Domingo, Nia Long, Ket Grem we Kendrik Sempson çykyş etdi.
