San-Fransiskodan robotlar bilen meşgullanýan Physical Intelligence startapy nobatdaky maliýeleşdiriş tapgyrynyň dowamynda 400 mln dollar maýa çekdi. CNBC-niň habar bermegine görä, maýadarlaryň hataryna Amazon kompaniýasyny esaslandyryjy, Blue Origin aerokosmos kompaniýasynyň eýesi Jeff Bezos we ChatGPT-ni dörediji OpenAI kompaniýasy hem goşuldy.
Şeýle-de, maýa goýmaga birnäçe uly wençur gaznalary gatnaşdy. Tapgyr tamamlanandan soň, startapyň bahasy 2,4 mlrd dollar diýlip hasaplandy.
Physical Intelligence taslamasynda Tesla, Google DeepMind, X ýaly uly korporasiýalaryň öňki öňdebaryjy hünärmenleri işleýär. Startap soňky sekiz aýda robotlar üçin uniwersal EA modelini işläp taýýarlamak bilen meşgullandy. Onuň ahyrky maksady adam aňyna deňeçer ýa-da ondan hem ösen emeli aňy döretmekden ybarat.
Startapa gatnaşyjylar eýýäm kir ýuwup, stoluň üstüni arassalap bilýän we başga-da şuňa meňzeş işleri ýerine ýetirýän robotlary öndürmäge mümkinçilik berýän algoritmleri işläp taýýarlaýar.
Jeff Bezosyň baýlygy häzir 205 mlrd dollar diýlip hasaplanylýar we ol milliarderler reýtinginde üçünji orny eýeleýär. OpenAI resmi taýdan heniz startap bolsa-da, soňky maliýeleşdiriş tapgyrynda 6,6 mlrd dollar maýa çekmek bilen kompaniýa derejesine ýetdi diýlip hasaplanylýar.
Bazar üçin bu waka maýadarlaryň zähmet bazaryny üýtgedip, awtomatlaşdyryşda täze mümkinçilikleri döredip biljek robototehnika we emeli aň pudagynda işläp taýýarlamalara ýokary gyzyklanmasynyň bardygyny görkezýär.
