Kia kompaniýasy Günorta Koreýada "Sportage 2026" krossoweriniň täzelenen görnüşini resmi taýdan hödürledi. Modeliň satuwy 2025-nji ýylyň ikinji çärýeginde meýilleşdirilýär diýip, CarExpert.com ýazýar.
Awtoulagdaky esasy üýtgeşmeleriň hatarynda 180 at güýjüne eýe 1,6 litrlik turbo görnüşli hereketlendiriji üçin sekiz tizlikli täze awtomatiki herekete geçiriji guty bar. Ondan öň kompaniýa awtoulaglaryny ýedi tizlikli, goşa klawişli awtomatiki herekete geçiriji guty bilen enjamlaşdyrypdy.
Içerki bazarda benzin we gaz bilen işleýän 2.0 litrlik hereketlendirijili (bu ýerde 6 tizlikli awtomatiki geçiriji ulanylýar) hem-de 1,6 litrlik hereketlendirijä eýe gibrid ulgamly ulag görnüşleri hödürlenýär, 6 tizlikli awtomatiki geçirijili model 65 at güýjüne eýe bolan elektrik hereketlendirijisi bilen enjamlaşdyrylandyr.
Koreýada bu awtoulagyň öň tekerleri we ähli tekerleri işleýän görnüşlerde, Awstraliýada bolsa diňe ähli tekerleri işleýän görnüşde elýeterli bolar.
Kia ses siňdiriji materiallar goşmak we amortizasiýany döwrebaplaşdyrmak arkaly ulagyň rahatlygyny ýokarlandyrdy, ses izolýasiýasyny (sesiň maşynyň içine eşidilmezligini) gowulandyrdy. Ulagyň daş görnüşindäki täzelikleriň arasynda diametri 17-19 dýuým bolan täze teker diskalary we kuzawosynyň reňkiniň üýtgeşmesi (palitrasy) bar.
Içinde Kia-nyň ccNC operasiýa ulgamy bilen işleýän 12.3 dýuýmlyk duýgur ekran bar, onuň üsti şol bir ölçegdäki sanly gurallar topary bilen doldurylýar. Şeýle-de baş ekran hakykata ýakyn hemra nawigasiýasy, nawigasiýa goldawy bilen uýgunlaşdyrylan kruiz dolandyryşy we howa täzeleýiş ulgamy bar.
Öňdebaryjy tehnologiýalaryň arasynda "Kia Digital Key 2" ulgamy smartfonlary we akylly sagatlary ulanyp, ulaga girişi dolandyrmaga mümkinçilik berýär. Şeýle hem ulagyň uly ýollarda howpsuz hereket etmegini ýokarlandyrmak üçin kömekçi ulgamy bar.
Awtoulagyň benzin bilen işleýän ýörite görnüşi dört sany düzüliş bilen hödürlenýär: Prestige, Noblesse, Signature we Signature X-Line. Olaryň bahalary 20.5-25,5 müň dollar aralygyndadyr. Haýsydyr bir bezeg derejesindäki düzülen ulagy almak üçin, oňa goşmaça 1600 dollar tölemeli bolar.
Şeýle-de 2.0 LPG hereketlendirijisi bolan "Sportage 2026" düzülende, onuň bahalary 21-den 26 müň dollar aralygyndadyr. Ulagyň ähli tekerleriniň işleýän görnüşi goşmaça çykdajyny goşaňda-da elýeterli däl.
Gibrid görnüşi ulagyň iň gymmadydyr. Olaryň düzülişleri birmeňzeş, ýöne bahalary 25-den 29,8 müň dollar aralygynda. Ähli tekerleri işleýän ulag bu ýerde goşmaça 1600 dollara satylýar.
