BMW Hytaý bazary üçin meşhur X5 krossoweriniň täze çäkli nusgada çykjak görnüşini hödürledi. Dark Flame atly ýörite wersiýa 1000 nusgada çykar diýip, auto.ru habar berýär.
Dark Flame -iň satuwy BMW X5-iň 25 ýyllygyna gabatlanýar.
Modeliň bahasy 830 000 ýuan (takmynan 117 000 dollar), şol bir hereketlendirijili adaty X5 modelinden 100 müň ýuan gymmat. Krossower radiator gözeneginiň, öňdäki bamperiň howa kanallarynyň we aýna bezeginiň altynsow öwüşgini, kuzowynyň üýtgeşik goýy gök reňki bilen tapawutlanýar. Şeýle hem awtoulag 22 dýuýmlyk ýörite tekerler bilen bezeldi.
Dark Flame-iň içki bölegi altyn sapakdan tikinli gara deri, petigi Alkantara we uglerod süýümi bilen bezelen.
Enjamlary dört zolakly howa gözegçiligini, şemalladyjyly oturgyçlary we Harman-Kardon ses ulgamyny öz içine alýar.
